الشرق الأوسط حاله اليوم ينعاف
تلعب ببيبانه رياح الصواديف
بان التصدع فالقواعد والأطراف
ولا عاد للافراح في داخله طيف
تالي سنينه عودت عوج وعجاف
وعواصف الثورات فوقه مراديف
شاف اله شي ما توقعه ينشاف
ويجهل وش اللي باقي ما بعد شيف
يمسي على درب الحوادث والأرجاف
ويصبح على شوف الدما شاطي وسيف
من تونس الخضرا بداية وميقاف
ثارت رقاب كانت أول معاسيف
ثم فر حاكمها ما عاد اله امنكاف
يوم أظهرت ماله بطون المظاريف
ومن عقبها ولع على مصر كشاف
وأكثر بنى الواقع طلع فيه تحريف
والريس اللي يلبس ثياب انضاف
ما فادته جسمه تحت لبسه مجيف
قاموا عليه الشعب في وقفة أشراف
وقالوا له ارحل خل عنك المعاريف
مار اشتغل فالدار ونان الاسعاف
وأرواحهم راحت لطرده مصاريف
لكن بعد صوت من الموت ما خاف
تنازل الريس و خلى المشاريف
وتوالت الثورات في كل الأطياف
ثم قام في البحرين شلة ملاقيف
وجوهم رجال الطيب من عصر الأسلاف
امطوعين النذل بالشلف والسيف
نالوا من الفتنة بتحطيم الأهداف
بالفعل ماهو بالحكى والسواليف
ارتاح يالبحرين لا تشكي اخلاف
حنا ذراك اليا نووك الخطاطيف
وانتقلت الثورة من اسناف لاسناف
والشارع الليبي حدته العواصيف
مع قايد شعبه من أفضاله انحاف
يرميهم لبحر الغنى ابلا مجاديف
ثاروا لو أن الموت للروح قصاف
وساقوا من الأعمار كل التكاليف
لين انثروا دمه على جرد الاكتاف
وصوت النوايح جاوبته الغطاريف
لكن دمع الشام لليوم ذراف
ما كفف دموعه بلى وضعه مخيف
شبع من اسنين القسا ظلم واجحاف
وأهله حموا من دون عرضه مواقيف
أرقابهم فاطن الها كف سياف
راحت على دربه حصاد وتناتيف
يكفي يا بشار الردى ذبح وأسراف
‪كبدك‬ مثل كبد الجحش عيت تعيف
شعبك غدى نصه لك فراش ولحاف
وأنته تبى الباقي يجيلك على الكيف
لا تفرح ابيقفاك موت ومذلاف
لو قلبك وقلب الخميني مواليف
وأن قاله الله فاليمن تنجح أحلاف
ويرحل حكم صالح بلا كذب وزيف
والثورة اللي جا الها يوم صراف
تقفي عن الديرة كما يقفي الضيف
هذي هجوسي سردها يتعب القاف
تشبه ورود من الحدايق مقاطيف
مثل الدرر من ندرها ما لها أوصاف
منها طلب بحر الجزالة مغاريف
ولو أدري أن اثقالها ترجع اخفاف
لا أترك مجال الشعر واشناه وأعيف

سلمان العتيبي

كلمات مميز جدا ومعبرة
موضوع رائع
يعطيك الف عافية
تحياتي وتقبل مرووري
بالتوفييق لكـــ..